Llandudno yn Dathlu Statws Baner Borffor
Llandudno yn Cwblhau ei Daith at Statws Baner Borffor…
Mae Llandudno wedi derbyn achrediad Baner Borffor, yn cydnabod y dref fel lleoliad diogel, croesawgar a bywiog i fwynhau yn ystod y nos.
Mae’r wobr yn dathlu cyrchfannau sy’n cynnig profiad o ansawdd uchel rhwng 5pm a 5am, gan gyfuno llefydd i fwyta, yfed, ymlacio a chael adloniant gyda safonau uchel o ddiogelwch, glanweithdra a gwaith partneriaeth.
I Landudno, mae’r cyflawniad yn nodi carreg filltir. Y dref yw’r cyrchfan cyntaf yng Ngogledd Cymru, a dim ond y trydydd yng Nghymru ar ôl Caerdydd ac Abertawe, i dderbyn statws Baner Borffor. Mae hefyd wedi creu hanes Baner Borffor trwy fod y cyrchfan cyntaf yn y byd i dderbyn yr achrediad, sy’n cynnwys pier o fewn ei ffiniau.
Beth yw’r Faner Borffor?
Mae’r Faner Borffor yn rhaglen achredu a gydnabyddir yn rhyngwladol ar gyfer canol trefi a dinasoedd. Yn aml, fe’i disgrifir fel yr hyn sy’n cyfateb â Baner Werdd ar gyfer parciau a Baner Las ar gyfer traethau, ond ar gyfer economi nos. Asesir cyrchfannau ar sut maent yn creu profiad difyr, amrywiol ac wedi’i reoli’n dda, ar ôl iddi nosi.
Mae’r rhaglen yn edrych ar ystod eang o ffactorau, gan gynnwys adloniant a chynnig diwylliannol, symudiad o amgylch y dref, mannau cyhoeddus, glanweithdra, gofal i gwsmeriaid, a sut mae sefydliadau lleol yn cydweithio i gefnogi preswylwyr, busnesau ac ymwelwyr.
Pam cafodd Llandudno ei gydnabod
Roedd cais llwyddiannus Llandudno yn amlygu cymeriad arfordirol unigryw y dref, ei apêl i ymwelwyr trwy gydol y flwyddyn, a’r ystod o gyfleoedd ar gael i fwynhau noson allan. Cafodd Venue Cymru ei gydnabod fel lleoliad adloniant a diwylliannol mawr, tra bod lleoliad naturiol y dref, y promenâd, busnesau lletygarwch a mannau cyhoeddus yn cyfrannu at gryfder y cais.
Gwnaed yr achrediad yn bosibl trwy gyllid gan Gronfa Ffyniant Gyffredin Llywodraeth y DU, a alluogodd Cyngor Bwrdeistref Sirol Conwy i sefydlu Gweithgor Baner Borffor aml-asiantaeth ac arwain y broses ymgeisio.
Roedd yr aseswyr yn canmol y dull cydweithredol a gymerwyd gan sefydliadau, busnesau gwirfoddolwyr a gwasanaethau cyhoeddus lleol. Cafodd cyfraniad y Tîm Tacluso gwirfoddol hefyd ei gydnabod, gydag aelodau’n gweithio ar y cyd â gwasanaethau stryd Cyngor Bwrdeistref Sirol Conwy i helpu cadw’r drefn yn lân, croesawgar a deniadol.
Cyflawniad ar y Cyd
Meddai’r Cynghorydd Sharon Doleman, Aelod Cabinet Economi Gynaliadwy a Chyfathrebu: “Rydym wrth ein boddau bod Llandudno wedi derbyn statws Baner Borffor. Dyma gyflawniad gwych i’r dref ac mae’n adlewyrchu ymrwymiad partneriaid ar draws y sectorau cyhoeddus a phreifat i gefnogi economi nos diogel, croesawgar a bywiog.
“Hoffwn ddiolch i’r Gweithgor Baner Borffor, busnesau lleol, gwirfoddolwyr a sefydliadau partner a gydweithiodd i helpu arddangos cryfderau cynnig nos Llandudno.”
Edrych i’r Dyfodol
Mae statws Baner Borffor yn ddathliad o’r hyn mae Llandudno eisoes yn ei gynnig ac yn fframwaith ar gyfer gwelliant parhaus. Mae’n cefnogi gwaith partneriaeth parhaus i gryfhau economi nos y dref, adeiladu hyder ac annog mwy o bobl i fwynhau Llandudno ar ôl iddi nosi.
O dripiau i’r theatr a pherfformiadau byw i lefydd i fwyta, mynd am dro ac awyrgylch cyrchfan croesawgar, mae achrediad Baner Borffor Llandudno yn atgyfnerthu ei enw da fel cyrchfan i fwynhau yn y dydd a’r nos.
