Beicio a Beicio Mynydd
Mae Sir Conwy yn gyrchfan ragorol i feicwyr o bob gallu - o deuluoedd sy'n chwilio am deithiau hamddenol, heb draffig i feicwyr mynydd sy'n chwilio am lwybrau coedwig cyffrous ac anturiaethau gwyllt oddi ar y ffordd. Mae digon i'w archwilio yma ar ddwy olwyn o lwybrau arfordirol, llwybrau drwy’r dyffryn â golygfeydd godidog a rhai o'r tiroedd beicio mynydd gorau yng Nghymru.
Dyma rai enghreifftiau o’r profiadau beicio sy’n aros amdanoch chi ar hyd a lled y sir…
-
Mae llwybrau beicio hygyrch a phrydferth yn Sir Conwy sy’n ymestyn am filltiroedd, ac maen nhw’n berffaith ar gyfer teuluoedd, dechreuwyr a beicwyr achlysurol. Mae'r Rhwydwaith Beicio Cenedlaethol yn rhedeg ar hyd yr arfordir o Fae Cinmel i Lanfairfechan, ac mae’n cynnig llwybrau gwastad, heb draffig yn bennaf, sydd â golygfeydd o'r môr a lleoedd hawdd i stopio ynddynt ar hyd y ffordd. Mae Dyffryn Conwy a'r ardaloedd o amgylch Llandudno a Betws-y-coed hefyd yn cynnig llwybrau rhwydd sy'n ddelfrydol ar gyfer teithiau hamddenol ar gefn y beic, picnics a gweld y golygfeydd ar ddwy olwyn.
Mae mannau lleol i logi beiciau ar gael yn eang mewn mannau fel Betws-y-Coed, Bae Colwyn, Conwy a Llandudno, sy’n gwneud beicio yn ddewis hawdd hyd yn oed os nad ydych chi wedi dod â'ch beic eich hun.
-
Mae Conwy yn faes chwarae i feicwyr mynydd, gan fod yma lwybrau sy'n addas ar gyfer beicwyr achlysurol, dechreuwyr llwyr a beicwyr mynydd profiadol. Pa un a ydych chi’n chwilio am daith hamddenol ar gefn beic mewn coedwig neu lwybr sengl heriol, mae rhywbeth i bawb ym mryniau a choetiroedd y sir.
O ddisgynfeydd cyflym i draciau graean llydan, gallwch chi ddod o hyd i lwybrau sy’n darparu ar gyfer pob lefel - perffaith i deuluoedd, unigolion sydd wrth eu bodd ag antur neu unrhyw un sy’n awyddus i archwilio’r tiroedd gwyllt.
-
Mae Llwybr Gwydir Mawr a Bach ym Mharc Coedwig Gwydir yn parhau i fod yn un o’r llwybrau mwyaf poblogaidd ymhlith beicwyr mynydd. Mae'r llwybr trac sengl 16 milltir (25 cilometr) hwn yn boblogaidd am ei ddringfeydd, ei rannau technegol a'i ddisgynfeydd cyffrous trwy goedwig garw. Mae’n ddewis gwych ar gyfer beicwyr sy’n chwilio am her go iawn ac ychydig o adrenalin.
-
Y tu allan i Fetws-y-coed, mae Llwybrau Penmachno yn cynnig profiad beicio mynydd gwych. Mae gan y llwybrau hyn gymysgedd o rannau llyfn, dringfeydd drwy’r coetir a golygfannau syfrdanol ac felly’n cynnig amrywiaeth o lwybrau sy’n addas i feicwyr canolradd ac uwch. Mae’r teimlad tawelach, mwy gwledig iddynt yn ychwanegu at yr antur.
-
Nid yw’r holl weithgareddau beicio yng Nghonwy yn golygu dringfeydd serth a disgyniadau creigiog. Mae Llwybr Beicio Llyn Elsi yn cynnig llwybr beicio mwy hamddenol drwy goedwig heddychlon ar draciau llydan ag arwyneb esmwyth iddynt. Mae’n ddelfrydol ar gyfer teuluoedd, beicwyr achlysurol neu unrhyw un sydd eisiau mwynhau’r golygfeydd heb ofynion technegol beicio mynydd.
-
Barod i archwilio ymhellach? Gallwch chi chwilio isod i ddod o hyd i lwybrau beicio, canolfannau llogi a llwybrau beiciau mynydd ledled Sir Conwy. Gallwch chi hefyd gysylltu â’n Canolfan Groeso gyfeillgar ar 01492 577577 i gael cyngor, syniadau a chymorth i drefnu eich antur feicio berffaith.
-
Ar lwyfandir Mynydd Hiraethog, mae’r Ganolfan Feicio yn Llyn Brenig yn cynnig gwasanaeth llogi beiciau ac amrywiaeth o lwybrau ar gyfer pob oed a gallu. Mae’r llwybrau ar hyd y llyn, y llwybrau cylchol drwy’r goedwig a’r golygfeydd eang yn ei wneud yn lle gwych ar gyfer diwrnod allan - pa un a ydych chi ar feiciau mynydd, beiciau graean neu’n mynd ar daith feicio hamddenol gyda’r teulu.
